აკადემიური უმაღლესი განათლების მეორე საფეხურზე (სამაგისტრო პროგრამებზე) სტუდენტთა ჩარიცხვა ხორციელდება შემდეგი კუმულატიური წინაპირობებით:

• საერთო სამაგისტრო გამოცდების საფუძველზე ან საქართველოს განათლებისა და მეცნიერების მინისტრის №224/ნ (2011 წლის 29 დეკემბერი) ბრძანების შესაბამისად;
• ინგლისურ ენაში (წერითი) გამოცდის წარმატებით გავლის შემთხვევაში ან ინგლისური ენის არანაკლებ B2 (Upper Intermediate) დონეზე ფლობის დამადასტურებელი საერთაშორისო სერთიფიკატის არსებობისას;
• ზეპირი გასაუბრების და წერითი ტესტირების წარმატებით გავლის შემთხვევაში;
• ადმინისტრაციული რეგისტრაციის და უნივერსიტეტის პრეზიდენტების ბრძანების საფუძველზე.

პროგრამაზე მიღების გამოცხადების შემთხვევაში, გააქტიურდება ბმული, რომელიც მსურველს საშუალებას მისცემს იხილოს ინგლისური ენის საგამოცდო ტესტების ნიმუშები.

უნივერსიტეტი უზრუნველყოფს პროგრამაზე სწავლის მსურველთა რეგისტრაციას პორტალზე, სადაც მათ საშუალება მიეცემათ მოუსმინონ ვიდეო ლექციების კურსს ეკონომიკაში, რომლის საფუძველზეც ჩატარდება წერითი გამოცდა ტესტირების სახით და ზეპირი გასაუბრება.

პროგრამის მიზანია მაღალკვალიფიციური სპეციალისტების მომზადება ეკონომიკის მიმართულებით - „სამართალი და ეკონომიკა“, რომელიც მოიცავს სამართლებრივი საკითხების ეკონომიკურ ანალიზს. პროგრამის კურსდამთავრებულები შეძლებენ რეგულირების ეკონომიკური გავლენის შესწავლას და მიღებული შედეგების დაინტერესებული მხარეებისთვის არგუმენტირებულად წარდგენას.

აღნიშნული გულისხმობს ეკონომიკის პოლიტიკის, თეორიისა და ეკონომიკური გადაწყვეტილების მიღების ღრმა და სისტემურ ცოდნასა და კრიტიკულ გააზრებას, დამოუკიდებლად კვლევის განხორციელების გზით „სამართლის და ეკონომიკის“ მულტიდისციპლინურ გარემოში წამოჭრილი რთული პრობლემების ანალიზის და მათი გადაწყვეტის ორიგინალური გზების ძიების, ისევე, როგორც საჭიროებისამებრ, დამოუკიდებლად ცოდნის გაღრმავების უნარს.

ეს შესაძლებლობას მისცემთ კურსდამთავრებულებს  დასაქმდნენ უნივერსიტეტებში, კვლევით ინსტიტუტებში, არასამთავრობო ორგანიზაციებში, საჯარო სექტორში და ეკონომიკაში მოქმედ დიდ კომპანიებში, რომლების ეფექტიანი ფუნქციონირება ითხოვს მუდმივ კვლევით აქტივობას (ბანკები, სადაზღვევო და საკონსულტაციო კომპანიები).

ზემოთ აღწერილი საქმიანობით პროგრამის კურსდამთავრებულები ხელს შეუწყობენ საჯარო და კერძო სექტორში ეკონომიკური ცვლილებების პირობებში ეფექტიანი გადაწყვეტილებების მიღებას.

კვლევითი უნარების გამომუშავების შედეგად კურსდამთავრებულს ასევე შეეძლება სწავლა განაგრძოს დოქტორანტურის საფეხურზე.

• ახსნა-განმარტებითი მეთოდი
• გუნდური მუშაობა
• დემონსტრირების მეთოდი
• დისკუსია/დებატები
• ინდუქცია, დედუქცია, ანალიზი და სინთეზი
• ინტერაქტიული ლექციები
• კრიტიკული ანალიზი
• ლიტერატურის მიმოხილვა
• პრეზენტაციების წარდგენა
• პრობლემაზე დაფუძნებული სწავლება
• პრობლემის გადაჭრაზე ორიენტირებული სავარჯიშოები
• პროექტებზე დაფუძნებული სწავლება
• შემთხვევის შესწავლა და ანალიზი (Case Study);
• შესაბამისი ინფორმაციის მოძიება ელექტრონულ ფორმატში ან ბიბლიოთეკაში
• წერითი მუშაობის მეთოდი
• წიგნზე მუშაობის მეთოდი

სამაგისტრო ნაშრომის დაცვაზე სტუდენტი დაიშვება თუ მას აქვს ჩაბარებული ყველა სავალდებულო სასწავლო კურსი და ჯამში დაგროვებული აქვს არანაკლებ 90 კრედიტი.

პროგრამა შედგება პროგრამის ძირითადი 102 კრედიტიანი სავალდებულო კომპონენტისგან. სამაგისტრო პროგრამის შემადგენელ დანარჩენ 18 კრედიტს სტუდენტი ირჩევს საკუთარი ინტერესების შესაბამისად.