დღეს საქართველო საჯარო ადმინისტრირების რეფორმისა და განვითარების ეტაპზეა, რაც მმართველობის ძველი სისტემიდან ახალ, დემოკრატიულ ღირებულებებზე დაფუძნებულ, ღია მმართველობის ფორმების დამკვიდრებასა და სერვისზე ორიენტირებული საჯარო ინსტიტუტების ჩამოყალიბებას გულისხმობს. ქვეყნის დემოკრატიული განვითარების გზაზე ამ უმნიშვნელოვანესი ცვლილებების წარმატებით განხორციელება კი მაღალკვალიფიციურმა და პროფესიონალმა საჯარო მმართველებისა და საჯარო მოხელეების ახალმა თაობამ უნდა უზრუნველყოს.

საჯარო მმართველობის საბაკალავრო პროგრამის მიზანი სწორედ დემოკრატიული აზროვნების, კვალიფიციური და კონკურენტუნარიანი კადრების მომზადებაა. პროგრამა შედგენილია საერთაშორისო გამოცდილებისა და საჯარო სექტორში დასაქმების ბაზარზე არსებული მოთხოვნის ფართო არეალის გათვალისწინებით და გამიზნულია მათთვის, ვისაც სახელმწიფო სამსახურში, არასამთავრობო და საერთაშორისო ორგანიზაციებში წარმატებული კარიერა აინტერესებთ.

პროგრამა მოიცავს საჯარო ადმინისტრირების სამივე განზომილებას - მენეჯერულ, სამართლებრივ და პოლიტიკურ-ეკონომიკურ ასპექტებს, ფოკუსირებულია საჯარო მმართველობის მენეჯერულ კონტექსტზე და განსაკუთრებული ყურადღება ეთმობა საქართველოში უახლეს და მიმდინარე პოლიტიკურ-ადმინისტრაციულ რეფორმებს, მათთან დაკავშირებულ გამოწვევებს, მათი გადაჭრის შესაძლებლობებსა და საუკეთესო საერთაშორისო პრაქტიკის შესწავლას.

სფეროს მულტიდისციპლინარული ხასიათიდან გამომდინარე, პროგრამა სტუდენტს აძლევს სახელმწიფო მართვის, საჯარო პოლიტიკის პროცესისა და პროგრამების ადმინისტრირების მრავალმხრივ ცოდნას, უყალიბებს პროფესიულ ხედვას და მისი პრაქტიკაში რეალიზების უნარ-ჩვევებს, რაც მნიშვნელოვანია, როგორც მათი პროფესიული კუთხით დასაქმებისა და კარიერული წინსვლისთვის, ასევე უფრო ვიწრო პროფესიული ინტერესების გამოკვეთისა და სწავლის შემდგომ საფეხურზე გაგრძელებისათვის.

შესაბამისად, პროგრამა სტუდენტებს ამზადებს საჯარო სექტორში წარმატებული საქმიანობისათვის, რომელთაც თეორიულ ცოდნაზე დაყრდნობით, ინოვაციური ხედვისა და ახალი იდეების გენერირების გზით შეეძლებათ წვლილი შეიტანონ საჯარო მმართველობის სისტემის გაუმჯობესებასა და ქვეყნის განვითარებაში.

• ახსნა-განმარტებითი მეთოდი
• გუნდური მუშაობა
• დემონსტრირების მეთოდი
• დისკუსიები/დებატები
• ინტერაქტიულ ლექციები
• ლექცია-სემინარები
• ლიტერატურის მიმოხილვა
• პრობლემაზე დაფუძნებული სწავლება
• პროექტებზე დაფუძნებული სწავლება
• სიახლეთა გარჩევა
• ქმედებაზე ორიენტირებული სწავლება
• შემთხვევის შესწავლა და ანალიზი
• წერითი მუშაობის მეთოდი

პროგრამა შედგენილია იმგვარად, რომ გათვალისწინებულია სტუდენტების დიფერენციაცია ენობრივი კომპეტენციების მიმართულებით. პროგრამა უზრუნველყოფს კურსდამთავრებულისთვის ინგლისური ენის ცოდნის გამომუშავებას, რომელიც ენების საერთო ევროპული სარეკომენდაციო ჩარჩოს (CEFR) B2 დონეს შეესაბამება, ხოლო პროგრამის თავისუფალ კრედიტებში გათვალისწინებულია ინგლისურის ალტერნატიული დონეები, თუ სტუდენტის კომპეტენცია პროგრამაზე ჩაბარების მომენტში არ შეესაბამება B2/2 დონეს (B1/1-დან B2/1 ჩათვლით). კერძოდ:

• პროგრამით დადგენილი მინიმალური ზღვრიდან ერთიან ეროვნულ გამოცდაზე დადგენილი მაქსიმალური ნედლი ქულის 63%-ის მიღების შემთხვევაში სტუდენტის დაშვება ხდება ინგლისური ენის B1/1 დონეზე  
• მაქსიმალური ნედლი ქულის 64%-დან 86%-ის მიღების შემთხვევაში სტუდენტის დაშვება ხდება ინგლისური ენის B1/2 დონეზე
• მაქსიმალური ნედლი ქულის 87%-დან 100%-ის ჩათვლით მიღების შემთხვევაში სტუდენტის დაშვება ხდება ინგლისური ენის B2/1 დონეზე 
• ერთიან ეროვნულ გამოცდაზე ინგლისურ ენაში მაქსიმალური ნედლი ქულის 93%-ზე მეტის მიღების შემთხვევაში სტუდენტს უტარდება ენის კომპეტენციის დამდგენი ტესტირება, რათა დაშვებულ იქნას ინგლისური ენის B2/2 დონის ჯგუფში
• სტუდენტებს, რომლებსაც ერთიან ეროვნულ გამოცდებზე არ ჩაუბარებიათ ინგლისური ენა, უტარდებათ დონის დასადგენი ტესტი და შემდეგ ხდება მათი რეგისტრაცია შესაბამის დონეზე, არაუმაღლეს B1/2-სა.

პროგრამა სტუდენტს აძლევს საშუალებას გაიაროს 18 ECTS თავისუფალი კრედიტების ფარგლებში.

ბაკალავრის აკადემიური ხარისხის მოსაპოვებლად სტუდენტმა უნდა მოაგროვოს 240 კრედიტი. 156 კრედიტის შესაბამის საგნებს სტუდენტი გაივლის პროგრამის ძირითადი საგნების ფარგლებში, ხოლო 24 ECTS კრედიტს - პროგრამის სავალდებულო ასარჩევი ბლოკებიდან, მათ შორის 12 ECTS - STEM ბლოკიდან,  ხოლო 12 ECTS - ჰუმანიტარულ-სოციალური ბლოკიდან. დანარჩენი 60 კრედიტის შევსება სტუდენტებს შეუძლიათ პროგრამის ასარჩევი საგნების და თავისუფალი კრედიტების (18 ECTS) ფარგლებში.